linluwi lili li pona a!

mi enujo a! enujo lili li tan ni: tenpo pini lili la, mi tawa e wile sona suli lon ma tomo Teje. enujo suli li tan ni: tenpo sike ni la, mi weka tan tomo sona la, pali mi li mute mute. taso mi o jo e musi e namako. ala la, mi monsuta mute. pali mi li ken pini kin.

mi lukin e lipu pi nasin linluwi Gemini tan seme? mi weka sona. taso, mi kama sona la, mi kama olin lon tenpo sama. nasin linluwi Gemini li seme? toki lili la, ni li linluwi pi lipu taso. toki esun kule li weka. leko walo insa leko pimeja lon lipu linluwi ali li weka. poki suli pi toki ilo CSS anu JavaScript li weka. lipu pi sitelen ABC li taso lon.

a. mi o toki e sona lili. nasin Gemini li lon sewi pi nasin TCP. nasin Gemini la, linja TCP wan li pana e lipu wan taso li pini. ken la, sina pilin e ni: ‘ni li sama HTTP/1.0. tenpo pana li mute.’ taso, lipu wan li wile ala e lipu ante (<img>, <script>, fetch()…) la, nasin ni li pona. toki namako Cookie li lon ala la, jan li jo ala e sijelo linluwi. taso, sina ken sitelen e nimi lon lipu len TLS pi jan wan. sina ken ala pana e lipu suli anu sitelen suli sama wile POST pi nasin HTTP. taso, sina ken toki lili. linluwi li sona e nimi sina kin.

ken pi lipu Gemini (gemtext) li lili tawa lipu Markdown a! lipu Gemini li jo ala e sitelen wawa e sitelen lape. sitelen natu li ken ala lon insa sitelen.
≫ sitelen natu li jo e linja wan sama mi.
sitelen en kalama musi li ken ala insa e lipu li lon sitelen natu taso. pona la, mi toki e ‘sitelen ABC li taso lon’ la kon li ni: sitelen إختبار en טעסט en 测试 en 😀. toki ilo CSS li weka la, jan sitelen li ante ala e lukin. ni li pona tan ni: jan lukin taso li sona e ni: lukin seme li pona tawa oko ona lon ilo ona. o pilin ala e ni: lipu ni li majuna lukin sama tenpo sike ale (centuria) pini. ilo lukin li pani e ni: lipu li pona lukin.

ken la sina pilin e ni: ‘nasin Gemini li lili mute. mi ken sitelen e ilo lukin anu ilo pana lon tenpo pimeja wan.’ pona a! sina sona e tan pi nasin Gemini anu ‘linluwi lili’. ‘linluwi lili’ li smolnet lon toki Inli. nasin Gemini li lili la, jan ali li ken pali kepeken jan wan. linluwi mute la, jan li wile e ni: ‘jan owan luka (100,000) anu owan luka wan (1,000,000) li wile e lipu linluwi mi lon tenpo sama. taso, lipu linluwi mi li awen wawa.’ linluwi lili la, sina wile ala e jan mute sama ni. sina wile ala esun e ilo wawa tawa ona mute. ala la jan ali li tawa lipu linluwi suli wan. jan li tawa lipu lili lon olin ona. ala la jan li lukin e nanpa monsi nena ‘👍 Like’. olin e ijo tan jan ante la, jan li sitelen tawa ona li sitelen lon ijo ona.

tenpo ni la, pilin jan tawa linluwi li ante mute. jan wan la, linluwi li awen pona li jo e sona mute. ona li pilin pona. jan ante la, linluwi li ken moli. lipu majuna en jan powe en toki utala li lon linluwi ali. alasa lon ilo Google la, lipu esun li taso lon. jan li toki e nasin Gemini lon lipu Hacker News la, mi ken kute e pilin ike. kin la, mi wile ala e ni: jan ali li pilin pona anu pilin ike tawa linluwi. peto sama la, nasin Gemini li pana weka e sitelen kule e len powe ni: jan li pali e lipu linluwi la, jan li jo e ni lon tenpo suno nanpa wan. ona li wile ala kin e ni: ona li linluwi suli sin. ona li wile e jan pona taso, li wile pona.